Óupplýstir krakkar krunka sig saman

21. jan 2008

„Það er fyllsta ástæða til að hafa mjög miklar áhyggjur af vaxandi kynþáttahatri hér á landi. Ég held að við séum að upplifa það,“ segir Jóhann R. Benediktsson, sýslumaður á Keflavíkurflugvelli.
Röð afbrotamála þar sem útlendingar hafa komið við sögu hafa kynnt undir kynþáttahatri og fordómafullri umræðu í garð útlendinga hér á landi. Fjallað hefur verið opinberlega undanfarið um útlendinga sem hafa verið handteknir fyrir nauðganir, líkamsárásir, rán, ölvunarakstur og nú síðast vegna gruns um að hafa banað 4 ára gömlum dreng í Reykjanesbæ.
Stofnuð hafa verið þjóðernissamtökin Ísland fyrir Íslendinga, ÍFÍ, í Reykjanesbæ. Meðlimirnir segja fyllstu ástæðu til stofnunarinnar þar sem landið sé beinlínis að drukkna í útlendingum.

Varar við upphrópunum
Aðspurður kannast Jóhann við hinn nýstofnaða hóp ÍFÍ og hefur heyrt af svipuðum hópum víðar. Hann tekur alvarlega alla neikvæða umræðu um útlendinga. „Mér finnst umræðan vera óupplýst og klisjukennd. Það er verkefni fyrir okkur að takast á við þessa umræðu og upplýsa fólkið. Í dag búum við yfir meiri þekkingu og tölfræði til að glíma við þennan vanda,“ segir Jóhann.
„Það er ekki gaman að heyra af svona hópum en kemur okkur hins vegar ekki á óvart. Við þurfum að kljást við þetta og grípa inn í atburðarrásina sem fyrst. Við viljum komast í nálægð við ungmennin og eiga við þau upplýsta og fordómalausa umræðu. Ég óttast að þarna séu óupplýstir krakkar að krunka sig saman.“

Toppurinn á ísjakanum?
Viðmælendur DV hafa áhyggjur af því að kynþáttahatur gæti aukist til muna ef til samdráttar á atvinnumarkaði kemur. Áhyggjur þeirra snúa að því að vandamálið verði fyrst raunverulegt og sýnilegt ef sú staða komi upp á Íslendingar fari að missa vinnu sína á meðan útlendingar halda sinni.
Á móti er hugsanlegt að með samdrættinum dragi úr umræðunni því ákveðið hlutfall útlendinga hér á landi er færanlegt vinnuafl.
Jóhann segir íslensk stjórnvöld geta skipulagt sig betur til aðlaga útlendinga að íslensku samfélagi. „Við eigum að geta aðlagað útlendinga betur að okkar samfélagi. Rétta aðferðin er hins vegar ekki að reisa múra og afneita þeim. Við þurfum að finna leiðir til að útiloka þessa óæskilegu einstaklinga. Mér finnst við eiga að ganga eins langt og við getum í þeim efnum,“ segir Jóhann.

Ýtir undir hatrið
Á síðustu vikum og mánuðum hefur skapast mikil þjóðfélagsumræða eftir alvarlega glæpi þar sem útlendingar hafa komið við sögu. Jóhann segir þessi tilvik síður en svo hjálpa til í umræðunni. „Hið sorglega slys sem varð á dögunum hefur vissulega magnað umræðuna. Okkur er hollt að rifja upp alvarlegt umferðarslys á Sandgerðisveginum fyrir tveimur árum. Í slysinu ók Íslendingur á pólska konu með þeim afleiðingum að hún stórslasaðist. Ekki snerist pólska samfélagið öndvert gegn okkur Íslendingum líkt og verið hefur undanfarið,“ segir Jóhann.

Þungar áhyggjur
Reykjanesbær hefur ráðið tvo Pólverja til starfa í þeirri von að brúa betur bilið milli landa sinna og annarra íbúa á svæðinu. Það var ákveðið eftir að bera fór á undiröldu kynþáttafordóma á fyrri hluta vetrar. „Pólverjarnir voru ráðnir til að slá á umræðuna, lægja öldurnar og koma útlendingunum betur inn í samfélagið. Það er stórt verkefni framundan í að bæta aðlögun og draga úr félagslegum vandamálum. Verkefnið er verðugt og er hreint fyrirmyndar framlag Reykjanesbæjar,“ segir Jóhann.
„Ég hef heyrt á Pólverjunum að þeir hafa þungar áhyggjur af sumum löndum sínum sem hingað koma. Ég hef heyrt á þeim að sumir þeirra séu hvergi æskilegir, ekki einu sinni heima fyrir. Fyrir vikið setji þessir fáu einstaklingar svartan blett á hið stóra pólska samfélag hér á landi. Langflestir Pólverjarnir eru hins vegar harðduglegt fyrirmyndar fólk.“

Farið að bitna á krökkunum
Jóhann hefur orðið var við að kynþáttafordómarnir séu farnir að færast niður í grunnskólastarfið. Hann segir slík mál hafa komið inn á borð til embættisins. „Ég þekki umræðuna um að þetta sé farið að bitna á börnum útlendinga í skólunum og höfum vitneskju um slík tilvik. Þannig hafa börnin orðið fyrir áreiti fyrir það eitt að vera ekki fædd á Íslandi. Þetta hafa verið afskaplega ósanngjörn og döpur mál,“ segir Jóhann.
„Vissulega hefur ákveðinn hópur útlendinga verið að valda okkur vandræðum. Það eru fyrst og fremst karlmenn sem hér starfa tímabundið og eru án fjölskyldunnar. Svo hafa slæðst hingað óæskilegir einstaklingar, með vafasama fortíð, sem jafnvel eru ekki einu sinni velkomnir í heimalandinu.“

Vandi víða
Aðspurður útilokar Jóhann að kynþáttafordómar séu bundnir við Suðurnesin og telur vandann ekki meiri eða flóknari þar en annars staðar. Hann segir menningamun þjóðanna spila stóra rullu. „Þessi vandi er víða. Við erum að glíma við ákveðinn menningarmun þar sem hegðun tíðkast í heimalandinu sem ekki tíðkast hjá okkur. Framkoma og víndrykkja er til að mynda ólík milli þjóðanna,„ segir Jóhann.
Fyrir vikið þurfum við að vinna í báðar áttir, annars vegar taka á óupplýstri umræða meðal Íslendinga og hins vegar fræða útlendinga um íslenskt samfélag.„

Óupplýst umræða
Jóhann segir síðustu mánuði hafa verið mjög lærdómsríka. Hann kallar eftir fórdómalausri umræðu um málefni útlendinga. „ Það er erfitt að tala um útlendinga í einni andrá. Það er ljóst að sumir eru friðsamari en aðrir. Ef útlendingar virða ekki okkar leikreglur finnst mér hins vegar að þeir hafi um leið fyrirgert rétti sínum að fá að vera hérna,“ segir Jóhann.
„Við verðum að vera málefnaleg. Það er ekkert einfalt í þessum málum en við getum ekki einangrað okkur í þeirri umræðu að vera á móti útlendingum. Það er umræða hins óupplýsta.“

visir.is - Mennta útlendinga til að manna störfin

21. jan 2008

Mikil mannekla hrjáir Hrafnistu í Reykjavík og Hafnarfirði. Þrátt fyrir lokkandi umsóknir hafa viðbrögð verið lítil og hafa stjórnendur Hrafnistu því brugðið á það ráð að bjóða upp á tveggja mánaða nám á launum gegn því að viðkomandi starfi við aðhlynningu í tvö ár. Hér eru forsvarskonur verkefnisins, Hrönn Ljótsdóttir félagsráðgjafi, Lovísa Jónsdóttir fræðslustjóri og Alma Birgisdóttir hjúkrunarforstjóri. fréttablaðið/eyþór árnason

Sér heilsugæsla fyrir útlendinga

17. jan 2008

Heilsuverndarstöðin við Barónsstíg. Árvakur/Ómar

Sér heilsugæsla fyrir útlendinga

Heilsuverndarstöðin stefnir að því að opna lækna- og hjúkrunarmóttöku fyrir ósjúkratryggða innflytjendur eftir nokkrar vikur. „Við vitum að þörfin er mikil hér. Á höfuðborgarsvæðinu eru 5000 til 6000 ósjúkratryggðir innflytjendur og þeir þurfa á þessari þjónustu að halda. Við ætlum að koma til móts við fólk sem hefur sótt vaktþjónustu sem hefur verið bæði dýr fyrir það sjálft og einnig samfélagið," segir María Ólafsdóttir, sviðsstjóri heilbrigðisþjónustu hjá Heilsuverndarstöðinni.

Undanfarna tvo til þrjá mánuði hefur fjöldi austurevrópskra karlmanna sem komið hafa á slysadeild Landspítalans verið 120 til 140 í hverjum mánuði.

Komurnar hafa ekki bara verið vegna slysa heldur einnig vegna kvilla sem ættu heima á heilsugæslunni, að því er Ófeigur Þorgeirsson yfirlæknir greindi frá í 24 stundum fyrr í þessum mánuði.

Vegna mikils fjölda Pólverja meðal innflytjenda er gert ráð fyrir pólskumælandi starfsmanni, lækni eða hjúkrunarfræðingi, við störf hverju sinni á móttökunni fyrir útlendinga í Heilsuverndarstöðinni. Til að byrja með verður móttakan opin frá 10 til 14.

„En ef þetta vex getum við haft opið frá 8 til 16," tekur María fram. Komugjald verður 4100 krónur sem er samkvæmt taxta Tryggingastofnunar ríkisins fyrir ósjúkratryggða.

Sigurði Guðmundssyni landlækni líst vel á hugmyndina um fyrirhugaða heilbrigðisþjónustu fyrir útlendinga. „Okkur finnst þetta góð hugmynd sem geti gengið upp og verið til gagns en með þeim formerkjum að hún sé hugsuð sem skammtímalausn. Það skiptir gríðarlega miklu máli að við séum ekki að klæðskerasauma lausnir fyrir útlendinga til langframa. Þeir þurfa að komast inn í heilbrigðiskerfið eins og inn í þjóðfélagið að öðru leyti og þessi viðkomustöð, sem fyrst og fremst á að vera ætluð þeim sem eru hér skemur en í sex mánuði og eru þess vegna ekki sjúkratryggðir, gæti verið liður í því."

Grét þegar ég frétti af ÍFÍ

16. jan 2008

 

Mynd: Getty

Dominika Majewska, 20 ára pólsk afgreiðslustúlka, felldi tár þegar hún frétti af stofnun þjóðernissamtakanna Ísland fyrir Íslendinga, ÍFÍ. Hún hefur verulegar áhyggjur af vaxandi útlendingahatri Íslendinga. „Ég grét þegar ég frétti af þessu og það var hræðilegt að lesa ummæli sem meðlimir samtakanna létu hafa eftir sér,“ segir Majewska.

DV heldur áfram umfjöllun sinni um útlendingahatur og fordóma. Sjá nánar í DV í dag.

Áhyggjur af auknu kynþáttahatri

14. jan 2008

 

Mynd: Getty

„Það er fyllsta ástæða til að hafa mjög miklar áhyggjur af vaxandi kynþáttahatri hér á landi. Ég held að við séum að upplifa það,“ segir Jóhann R. Benediktsson, sýslumaður á Keflavíkurflugvelli, í samtali við DV í dag. Röð afbrotamála þar sem útlendingar hafa komið við sögu hafa kynt undir kynþáttahatri og fordómafullri umræðu í garð þeirra hér á landi.

Aðspurður segist Jóhann kannast við félagið Ísland fyrir Íslendinga í Reykjanesbæ sem DV hefur greint frá. Hann segist taka alvarlega alla neikvæða umræðu um útlendinga. „Mér finnst umræðan vera óupplýst og klisjukennd. Það er verkefni fyrir okkur að takast á við þessa umræðu og upplýsa fólkið,“ segir Jóhann.

Nánar er fjallað um málið í DV í dag.