Pólverjar vilja taka þátt í uppbyggingu

11. nóv 2008

Vinnumálastofnun áætlar að um 13 þúsund útlendingar séu nú á vinnumarkaði og að þeir verði um tíu þúsund í árslok. Fyrir ári voru þeir hins vegar um 17.500 að sögn Karls Sigurðssonar, forstöðumanns vinnumálasviðs hjá Vinnumálastofnun.

Miroslaw Luczynski, ráðgjafi hjá Alþjóðahúsinu, segir að löndum sínum, Pólverjum, hafi hugsanlega fækkað um 2.500 til 3.000 á síðustu tveimur mánuðum. „En svo er það stór hópur sem hefur fest rætur hér og það er ekkert fararsnið á honum," segir hann. „Margir þeirra hafa ekki skuldsett sig en frekar safnað og sjá því að þeir standa betur að vígi en margur annar og þeir vilja því hjálpa til við að byggja upp nýtt Ísland, til dæmis með því að stofna lítil fyrirtæki og útvega þannig vinnu. Það er bara þannig, að ef þú gengur oft sömu götuna verður hún gatan þín og ef þú horfir oft á Esjuna verður hún Esjan þín."

Hann segir enn fremur að flestir Pólverja fari ekki á atvinnuleysisbætur lengur en í einn til tvo mánuði. „Vinnan er fyrir marga þeirra helsta tenging við samfélagið og ef hún er ekki til staðar finnst þeim þeir ekkert hafa hér að gera. Það er líka gott að menn séu ekki lengi á bótum því þær hrökkva skammt svo það er ekkert hægt að gera nema reyna að lifa af og þannig ástand getur oft leitt til félagslegra vandamála."

Í síðustu viku stóðu Alþjóðahús og Mannréttindaskrifstofa Reykja­víkur fyrir málþingi um atvinnumál útlendinga á Íslandi. Þar kom fram í máli Halldórs Grönvold, aðstoðarframkvæmdastjóra og deildarstjóra félagsmáladeildar Alþýðusambands Íslands, að samkvæmt könnun sambandsins þyki 34 prósentum fólks á aldrinum 18 til 35 ára það eðlilegt að Íslendingar njóti betri kjara en útlendingar. Könnunin var gerð síðastliðið sumar. „Það sem kom okkur nokkuð á óvart var að meðal þeirra sem yngri eru, til dæmis í hópnum frá 18 til 20 ára þá var þetta hlutfall jafnvel hærra," segir Halldór. „Við verðum að bregðast við þessu því slík viðhorf geta verið frjó gróðrarstía fyrir útlendingaandstyggð."

jse@frettabladid.is

Heimildir: visir.is (http://visir.is/article/20081111/FRETTIR01/845355606/0&SearchID=7333694734552)

Geir staðfestir pólska aðstoð

07. nóv 2008

Geir H. Haarde, forsætisráðherra, staðfesti á blaðamannafundi að pólsk stjórnvöld ætli að lána Íslendingum 200 milljónir Bandaríkjadala. Í hádeginu kannaðist forsætisráðherra ekki við lánið sem greint var frá í erlendum fjölmiðlum. Geir sagði að þetta hafi fengist staðfest í samtali fjármálaráðherra Íslands og Póllands.

 

Aðspurður segir Geir að ástæðan fyrir því að hann vissi  ekki um lánið frá Pólverjum skýrist af því að Pólverjar leituðu til Svía. Pólski fjármálaráðherrann sagði við Árna M. Mathiesen, fjármálaráðherra, í dag að þeir þekktu erfiðleika af þessu tagi auk þess sem fjöldi Pólverja hafi starfað hér. Geir þakkaði Pólverjum fyrir stuðninginn og segir að um drengskaparbragð sé að ræða.

 

Hann segir að frumkvæðið hafi algjörlega komið frá Pólverjum líkt og Færeyingum og fyrir það beri að þakka.

 

Til viðbótar við IMF hafa íslensk stjórnvöld rætt við hin Norðurlöndin og Rússa um lán og síðan hafi bæði Færeyingar og Pólverjar bæst við í þann hóp sem ætla að lána Íslendingum, sagði Geir og bætti við að ekki hafi verið boðaður nýr fundur með Rússum um mögulegt lán.

 

Geir sagði á fundinum að Jose Manuel Barroso, forseti framkvæmdastjórnar Evrópusambandsins, hafi boðið Íslendingum lán úr neyðarsjóði Evrópusambandsins. Hann hafi svarað bréfinu strax og að Íslendingar myndu þiggja aðstoð úr sjóðnum. Afgreiðslan taki hins vegar með flýtimeðferð fjórar til sex vikur og sé því ekki hluti af pakkanum nú með IMF. Geir sagði að fjármálaráðherra hafi upplýsingar um að ekki sé um háar fjárhæðir að ræða sem Íslendingar gætu fengið úr sjóðnum.

 

 

 

Heimild: mbl.is (http://mbl.is/mm/frettir/innlent/2008/11/07/geir_stadfestir_polska_adstod/)

Þrír í hungurverkfalli

07. nóv 2008

Þrír hælisleitendur hafa verið í hungurverkfalli frá því klukkan sex á þriðjudagsmorgun. Þeir krefjast þess að þeir, og aðrir hælisleitendur, fái hraða úrlausn sinna mála og verði veitt dvalarleyfi.

„Útlendingastofnun getur ekki skipt sér af því hvort menn borða eða ekki," segir Haukur Guðmundsson, settur forstjóri Útlendingastofnunar. Mál allra hælisleitenda séu í ákveðnu ferli sem verði ekki flýtt með þessu móti.

Tveir mannanna, þeir Mehdi og Farzad, eru frá Íran. Majid er frá Alsír. Þeir hafa verið hér á landi í á bilinu tvö og hálft til fjögur og hálft ár. Allir hafa þeir dvalið að Fitjum í Reykjanesbæ en þar er dvalarstaður hælisleitenda hér á landi.

Farzad segir þá félaga eingöngu hafa drukkið örlítið af vatni frá því á þriðjudagsmorgun. „Við þurfum að gera það, til að halda í okkur lífinu. Við vitum að Útlendingastofnun vinnur afar hægt. En við ætlum ekki að borða fyrr en við fáum réttu svörin."

Þetta er í annað sinn sem Farzad fer í hungurverkfall. Það gerði hann einnig í september síðastliðnum eftir að lögreglan lagði hald á fé úr herbergi hans í húsleit að Fitjum.

Heimildir: visir.is (http://visir.is/article/20081107/FRETTIR01/985979603/-1)

4.400 sagt upp í hópuppsögnum

05. nóv 2008

Alls hefur yfir 4.400 manns verið sagt upp á árinu 2008 meðhópuppsögnum. Stærstur hluti uppsagnanna barst í lok október eða um67%, eða um 2950 manns frá 64 fyrirtækjum. Fram að því höfðu borist frá0 til 4 tilkynningar í hverjum mánuði.

 

 Um 46% tilkynninganna voruvegna starfsmanna í mannvirkjagerð. Uppsagnir í fjármálastarfsemi, þarsem uppsagnir Landsbanka, Glitnis og Kaupþings vega þyngst, eru um 20%af tilkynningunum. Tæp 14% uppsagnanna koma úr verslunargeiranum og um11% úr iðnaði, í flestum tilvikum tengdur mannvirkjagerð. Um 4%uppsagna er í sérfræðistarfsemi og útgáfustarfsemi og tæp 4%uppsagnanna eru úr flutningastarfsemi þar sem póstdreifing vegurþyngst. Loks voru 1% uppsagna úr ýmiskonar þjónustu, samkvæmt upplýsingum á vef Vinnumálastofnunar.

 

Um 93% uppsagnanna eru vegna starfsfólks á höfuðborgarsvæðinu en aðraruppsagnir dreifast á Suðurnes, Vesturland Norðurland eystra ogSuðurland.

 

Heildarfjöldi starfsmanna þeirra fyrirtækja sem tilkynntu uppsagnir ertæplega 11.000 og því eru þessi fyrirtæki sem um ræðir að segja upp um28% starfsmanna sinna að jafnaði.

 

Mjög misjafnt er þó milliatvinnugreina hve hátt hlutfallið er. Þannig eru fyrirtæki ímannvirkjagerð að jafnaði að segja upp ríflega 42% sinna starfsmanna oger dreifingin allt frá 15% upp í 100%. Hlutfallið er svipað íflutningastarfsemi eða rúm 40%. Í iðnaði, sérfræðilegri starfsemi ogýmissi þjónustu er hlutfallið nálægt 35%, 20% í verslun og um 16% ífjármálastarfsemi.

 

Uppsagnirnar koma til framkvæmda allt upp í 6 mánuði. Upplýsingar umhvenær nákvæmlega einstakar uppsagnir koma til framkvæmda eru fremuróljósar, en þó má segja að á tímabilinu 1-3 mánuðir sé algengast, nemaí fjármálastarfsemi þar sem um er að ræða tímabil sem nær yfir 3-6mánuði. Flestar þessara uppsagna koma til framkvæmda um næstumánaðarmót, og svo um áramót og um mánaðarmótin jan./feb. 2009.

 

Ástæður uppsagna eru nánast alltaf verkefnaskortur, fjárhagserfiðleikarog óvissan framundan. Margir eru því að segja upp til að búa sig undirerfiða stöðu eftir 2-3 mánuði og vonast til að geta endurráðiðstarfsfólk að einhverju marki áður en til starfsloka þeirra kemur efverkefnastaða gefur tilefni til.

 

 

 

Heimild: mbl.is (http://mbl.is/mm/frettir/innlent/2008/11/05/4_400_sagt_upp_i_hopuppsognum/)

Obama kjörinn forseti

05. nóv 2008

Barack Obama var í dag kjörinn 44. forseti Bandaríkjanna. Þetta var ljóst eftir að kjörstöðum var lokað í Kalíforníu á vesturströnd Bandaríkjanna klukkan 4 í nótt að íslenskum tíma. Obama sigraði í ríkinu, fékk 55 kjörmenn og hafði þá tryggt sér 297 kjörmenn samkvæmt spám bandarískra sjónvarpsstöðva. 270 kjörmenn þarf til sigurs.

 

Ljóst þykir að þessi úrslit munu hafa mikil áhrif á stjórnmál í Bandaríkjunum og á alþjóðvettvangi.

 

Obama, sem er 47 ára, mun sverja embættiseið 20. janúar á næsta ári og taka við afar erfiðu búi af George W. Bush, sem verið hefur forseti undanfarin átta ár. Miklar blikur eru á lofti í efnahagsmálum Bandaríkjanna vegna alþjóðlegrar fjármálakreppu og afar dýrra hernaðaraðgerða Bandaríkjanna í Afganistan og Írak.

 

Obama hefur heitið því að bæta tengsl Bandaríkjanna við bandalagsþjóðir sínar og reyna að taka upp samskipti við óvinaþjóðir á borð við Norður-Kóreu og Íran. Hann hefur einnig heitið því að takast á við loftslagsbreytingar af mannavöldum og tryggja öllum Bandaríkjamönnum aðgang að heilsugæslu.

 

Obama er sonur hvítrar móður frá Kansas en faðir hans var frá Kenýa. Hann var kjörinn í öldungadeild Bandaríkjaþings fyrir fjórum árum og þótti taka áhættu þegar hann gaf kost á sér sem forsetaefni demókrata á síðasta ári. Hann sigraði Hillary Clinton í forkosningum Demókrataflokksins og í dag bar hann sigurorð af John McCain, frambjóðanda Repúblikanaflokksins.

 

Skoðanakannanir hafa undanfarnar vikur bent til þess að Obama myndi sigra. Hann hefur lagt áherslu á aðgerðir til að mæta fjármálakreppunni og þótti sýna leiðtogahæfileika í kosningabaráttunni og kappræðum við McCain, sem hélt því fram að Obama væri reynslulaus og myndi fylgja sósíalískri skattastefnu yrði hann kjörinn.

 

Demókratar unnu einnig mikinn sigur í kjöri til Bandaríkjaþings, sem fór fram samhliða forsetakjörinu, bæði í öldungadeild og fulltrúadeild þingsins. Í öldungadeildinni virtust demókratar hafa fengið 53 þingmenn kjörna, repúblikanar 45 og tveir óháðir þingmenn náðu kjöri. Í fulltrúadeildinni fengu demókratar 244 þingmenn, bættu við sig 8 þingsætum en repúblikanar fengu 191 þingsæti.

 

Heimild: mbl.is (http://mbl.is/mm/frettir/erlent/2008/11/05/obama_kjorinn_forseti/)