Ódæðisverk í nafni trúar

21. apríl 2008

Salmann Tamimi stendur í ströngu á bloggsíðu sinni en þar segist hann gleðjast yfir því að kerfið hjá okkur Íslendingum virki. Hann segir að með því að loka bloggsíðum sem breiða út hatur og lygar á netinu sé málfrelsið tryggt. Skemmst er að minnast þess að bloggsíðu Skúla Skúlasonar var lokað á dögunum vegna skrifa um íslam. Salmann segir að boðskapur íslams sé kærleikur, virðing og jafnrétti. Hins vegar fremji menn um allan heim ódæðisverk í nafni trúar sinnar.

„Þetta er nákvæmlega eins alls staðar og þarf ekki að fara lengra en til Íslands, þar sem við höfum Guðmund í Byrginu að fremja ódæði í nafni kristinnar trúar, eða til Texas þar sem stúlkum var haldið nauðugum. Allt í nafni trúarinnar,“ segir hann. Viðbrögðin láta ekki á sér standa því liðlega tvö hundruð manns hafa skrifað athugasemdir við færsluna. Mörgum er heitt í hamsi.

Heimild: dv.is (http://dv.is/frettir/lesa/7806)

Flytjast 3.000 útlendingar burt?

20. apríl 2008

Gissur Pétursson, forstjóri Vinnumálastofnunar, spáir því að erlendu fólki á vinnumarkaði fækki um að a.m.k. 3.000 manns í ári. Þetta geti orðið til þess að atvinnuleysi aukist hægar hér á landi en það hefði annars gert. Hann telur ólíklegt að atvinnuleysið fari upp fyrir 2% á þessu ári líkt og Seðlabankinn spáir.

 

Í síðasta mánuði mældist það 1,05% en það jafngildir því að 1.674 hafi að meðaltali verið án vinnu í mánuðinum. Í sögulegu samhengi er þetta afar lítið atvinnuleysi. Í sama mánuði í fyrra var atvinnuleysið 1,3% og þá voru flestir sammála um að atvinnuástandið væri mjög gott.

 

En hvað er fram undan í atvinnumálum? Menn eru almennt sammála um að erfitt sé að spá um hvað gerist á næstu misserum. Í nýrri skýrslu fjármálaráðuneytisins er bent á að aldrei áður hafi jafnstór hluti vinnuaflsins verið af erlendum uppruna og ekki sé vitað í hve miklum mæli erlendir starfsmenn verði hér áfram ef þeir missi atvinnuna.

 

Seðlabankinn lækkaði spá sína

Í haust spáði Seðlabankinn 2,7% atvinnuleysi á þessu ári. Í spá sem bankinn birti í síðustu viku hefur hann lækkað töluna niður í 2,1%. Fjármálaráðuneytið birti þjóðhagsspá í þessari viku og þar er spáð 1,7% atvinnuleysi. Ráðuneytið hafði sömuleiðis spáð meira atvinnuleysi í fyrri spá sinni. Atvinnuleysi á fyrstu þremur mánuðum ársins hefur verið um 1% og það er því ljóst að ef spá Seðlabankans um 2,1% atvinnuleysi á árinu öllu á að ganga eftir þarf það að fara upp fyrir 3% í haust.

 

Gissur segir að um 17 til 18 þúsund erlendir starfsmenn séu á vinnumarkaði. Hann segist reikna með að þeim komi til með að fækka um 3.000 á þessu ári, jafnvel meira. Þetta leiði til þess að atvinnuleysið verði ekki eins mikið og það hefði annars orðið.

 

Þess ber þó að geta að verulegt streymi útlendinga er enn til landsins og raunar sýna tölur fyrir fyrstu þrjá mánuði ársins að álíka margir komu til landsins á tímabilinu og sömu mánuði í fyrra.


Heimild: mbl.is (http://mbl.is/mm/frettir/innlent/2008/04/20/flytjast_3_000_utlendingar_burt/)

Félag Anti-Rasista tók þátt í málþinginu "Hinn grunaði er útlendingur"

19. apríl 2008

Ég skellti mér á ráðstefnuna í Salnum, í Kópavogi í gær. Ekki náði ég þó allri ráðstefnunni en náði þó að sjá hlut Félags Anti-Rasista í síðustu umræðum dagsins. Þar ræddu fjórir menn um hvort rétt væri að tilgreina þjóðerni manna í fréttaflutningi. Eftirfarandi menn ræddu málin og sátu fyrir svörum:

Dane Magnússon, formaður Félags Anti-rasista
Þorbjörn Broddason, prófessor við Háskóla Íslands
Stefán Eiríksson, lögreglustjóri á höfuðborgarsvæðinu
Jón Kaldal, ritstjóri Fréttablaðsins

Ég var ekki alveg sáttur við hversu mjög tímanum var misskipt á milli mannana. Stefán og Jón fengu nær allan tímann til að tjá sig á meðan Dane fékk enn minni tíma og Þorbjörn nánast engann.

Ef ég man rétt þá tjáði Þorbjörn sig aðeins einu sinni á fundinum í upphafsspurningunni sem allir fengu sem hljóðaði "á að tilkynna þjóðerni manna í fréttaflutningi". Þorbjörn svaraði því til að það gæti valdið fordómum að birta þjóðerni afbrotamanna í fréttaflutningi.

Jón Kaldal svaraði spurningunni á þá leið að stundum væri nauðsynlegt að taka fram þjóðerni manna í fréttum en hann skaut yfir markið þegar hann sagði það hafa verið í lagi að birta þjóðerni grunaðs manns á þeim grundvelli að bæjarbúar hafi verið byrjaðir að tala um sín á milli að Pólverji hefði framið glæpinn. Það er hinsvegar alls ekki sniðugt að hafa birt þjóðerni grunaðs manns vegna orðróms bæjarbúa. Jón svaraði nokkrum spurningum á fundinum og minntist meðal annars á dálk nýrra Íslendinga í Fréttablaðinu. Sá dálkur er áhugaverður og gott framtak hjá Fréttablaðinu að gefa fólki færi á að kynna sér hvernig það er fyrir nýja Íslendinga að komast inn í samfélagið.

Stefán Eiríksson lögreglustjóri svaraði spurningunni ef ég man rétt á svipaðann hátt og Þorbjörn. Hann fjallaði einnig um það að lögreglan réði innflytjendur til vinnu og hefði lært og væri enn að læra um hvernig beri að bregðast við dauðsföllum annara trúarhópa en kristinna. Þessu fagna ég enda þarf að sjálfsögðu að læra inn á siði annars fólks til að sameining geti skapast í samfélaginu. Þó kom upp leiðinlegt atvik á fundinum sem ég mun fjalla um síðar sem ég tel því miður vera til vansa fyrir Stefán.

Dane Magnússon, formaður Félags Anti-Rasista, svaraði upphafsspurningunni á svipaðan hátt og Þorbjörn og benti réttilega á að það getur skapað hatur gegn heilu þjóðunum að taka í sífellu fram þjóðerni brotamanna þar sem slíkt persónugerir heilar þjóðir út frá gjörðum örfárra. Hann benti einnig á það að það að nafngreina grunaða menn væri af hinu illa þar sem það getur lagt líf þeirra sem eru grunaðir en eru saklausir í rúst. DV á sínum tíma var þekkt fyrir þessar aðferðir og varð það frægt þegar maður svipti sig lífi eftir að blaðið hafði sagt að hann nauðgaði drengjum. Þarna skipaði blaðið sér í dómarasæti og tók í raun manninn af lífi án þess að þetta væri sannað á hann.

Nokkrir einstaklingar fengu að spyrja spurninga á fundinum og ber þar að nefna Paul Niklov, Þingmann Vinstri Grænna og eina innflytjendanum á þingi, en hann tjáði sig meðal annars mikið um grein Jóns Gnarr sem birtist fyrir nokkrum árum þar sem Jón gerir grín að fréttaflutningi sem tilgreinir kynhneigð afbrotamanns til að sýna fram á hversu fáránlegt það sé að vera að nefna þjóðerni manna í þessu samhengi.

Amal Tamini sem situr í bæjarstjórn Hafnarfjarðar, fyrst innflytjenda, tjáði sig um það að ef þjóðerni manna er nefnt í fréttaflutningi geti það valdið hatri á öllum úr þjóðflokknum sem nefndur er.

Eftir að Amal tjáði sig um þetta gerðist nokkuð sem olli hneykslun minni og allavega nokkra annara en þá tjáði Stefán lögreglustjóri sig um það að allt snerist um það hvernig fólk læsi úr fréttunum og fór að benda á fólk í salnum í háði. Bryndís, meðstjórnandi Félags Anti-Rasista, spurði hann þá hvernig hefði mátt lesa eitthvað annað en neikvætt út úr þeim fréttaflutningi sem hafður hafði verið uppi vegna hatursárásar á dökkann eiginmann hennar þar sem látið var hljóma að fjölskyldan væru í raun sökudólgarnir og þjóðerni hennar, barnastaða hjónanna og upplýsingar um búsetu voru gefnar upp. Þetta var afar beitt spurning og lögreglustjórinn átti fá svör við þessu og hann virtist vera skömmustulegur það sem eftir lifði fundar.

Stefán er ágætis maður og stóð sig að mörgu leiti vel á fundinum en þarna gekk hann allt of langt. Hann hneykslaði vissulega mig en særði þó aðra manneskju þar sem málefnið stóð henni mjög nálægt hjarta þar sem eiginmaður hennar varð fyrir fólskulegri árás og fjölmiðlar brugðust rangt við málinu. Skiljanlega gat hún ekki lesið neitt annað út úr þeim fréttaflutningi en það sem sagt var. Ég vona að Stefán finni það hjá sér að biðjast afsökunnar á þessum málaflutningi sínum enda var hann beinlínis rangur og ummælin voru særandi.

Félag Anti-Rasista er búið að sanna sig sem öflug samtök sem taka virkan og góðan þátt í þjóðmálaumræðunni og Dane stóð sig með prýði á fundinum þó svo að hann hefði mátt fá meira sviðsljós og lengri tíma til að tjá sig. Einnig taldi ég mjög hetjulegt af Bryndísi að láta ekki rangfærslur Stefáns sem vind um eyru þjóta og svara þeim á málefnalegann hátt.

Veruleg fækkun útlendinga á vinnumarkaði

19. apríl 2008

Mikill samdráttur í byggingariðnaði mun leiða til þess að fjöldi útlendinga sem starfað hafa við atvinnugreinina mun flytjast frá landinu.

Þetta segir Gissur Pétursson, forstjóri Vinnumálastofnunar, en hann spáir því að erlendu fólki á vinnumarkaði fækki um að a.m.k. 3.000

manns á þessu ári.

 

Heimild: mbl.is (http://mbl.is/mm/frettir/innlent/2008/04/19/veruleg_faekkun_utlendinga_a_vinnumarkadi/)

Ræðismaður Pólverja ánægður með fundinn

16. apríl 2008

 

Fundur Stefáns Eiríkssonar, lögreglustjóra á höfuðborgarsvæðinu, með Michal Síkorskí, ræðismanni Póllands á Íslandil, var mjög árangursríkur, að sögn þess síðarnefnda.

Síkorskí segir að ákveðið hafi verið að Íslendingar og Pólverjar myndu hafa mikla samvinnu við vinnslu mála sem snerta Pólverja hér á landi. Þá sagði hann að lögregluyfirvöld hér á landi hefðu fullvissað sig um að hart yrði tekið á málum pólskra glæpamanna sem hingað kæmu. Þá sagði Sikorskí ljóst að lagabreytinga væri þörf til að auðvelda samstarf Íslendinga og Pólverja á þessu sviði.

Stefán Eiríksson lögreglustjóri tekur undir með Sikorski að fundurinn hafi verið mjög gagnlegur og segist vonast til þess að þetta sé upphafið að góðu samstarfi lögreglunnar við Pólverja. Stefán segir að fundurinn komi í beinu framhaldi af fundi dómsmálaráðherra með Sikorski og sé að frumkvæði ráðherra.

Stefán segir að lögreglan reyni að hitta fulltrúa annarra ríkja reglulega og eftir því sem þurfa þyki og bendir sem dæmi á gott samstarf við lögregluna á Norðurlöndunum.

 

Heimildir: visir.is (http://visir.is/article/20080416/FRETTIR01/427132362)