Eigum að bjóða flóttamenn velkomna

23. maí 2008

„Ég get ekki tekið undir málflutning sem er til þess fallin að sá efasemdum og tortryggni í garð flóttamanna eða dregur í efa getu einstakra sveitarfélaga til þess að taka við hópi flóttamanna. Ég vil hvetja til þess að menn láti af slíku háttalagi og sameinist frekar í því verkefni að sýna flóttamönnum að þeir séu velkomnir til landsins og að óskað er eftir þátttöku þeirra í samfélaginu. Umræða um einstaka þætti sem varða málefni flóttamanna er þörf en hún á að grundvallast á viljanum til þess að gefa þeim kost á því að lifa og starfa í íslensku þjóðfélagi,“ segir Kristinn H. Gunnarsson, þingmaður Frjálslynda flokksins, í pistli á heimasíðu sinni.

Miklar deilur hafa verið á Akranesi í tengslum við hvort bærinn skuli taka við hópi 30 einstæðra palestínskra mæðra og barna þeirra sem dvalið hafa í flóttamannabúðum í Írak. Slitnaði upp úr meirihlutasamstarfi Sjálfstæðisflokksins og Frjálslynda flokksins vegna málsins þar sem Karen Jónsdóttir, fyrrverandi bæjarfulltrúi frjálslyndra, gekk til liðs við sjálfstæðismenn og myndaði með þeim hreinan meirihluta. Magnús Þór Hafsteinsson, varabæjarfulltrúi Frjálslynda flokksins á Akranesi og þáverandi formaður félagsmálaráðs Akraness, hafði þá gagnrýnt komu flóttamannanna, sagt aðdragandann of skamman og að velferðarkerfið væri ekki í stakk búið til að taka á móti þeim. Bæjarstjórn samþykkti svo nýverið að gengið yrði til viðræðna við félagsmálaráðuneytið um móttöku flóttamannanna. Var nýlega farið af stað með undirskriftasöfnun á Akranesi þar sem lagst var gegn komu hópsins.

Kristinn segir Íslendinga vera eina ríkustu þjóð veraldar sem eigi að beita sér af myndarskap í mannúðar- og hjálparstarfi hvort sem er á innlendum eða erlendum vettvangi. Ríkisstjórn og Alþingi eiga að setja mun meira fjármagn til málaflokksins á komandi árum en verið hefur til þessa. Í stefnuskrá Frjálslynda flokksins sé vikið að málefnum flóttamanna og þar sem lýst sé yfir stuðningi við því að bjóða þeim til búsetu og dvalar hér á landi.
Kristinn segir að verkefnin blasi við hvert sem litið er svo sem í Palestínu, Írak eða Darfur. „Það er verðugt verkefni fyrir Íslendinga að beita sér í auknum mæli fyrir bættum hag flóttafólks. Þegar í stað á að auka stórlega fjármagn til málaflokksins og verja því til þess að efla annars vegar hjálparstarf sem veitt er erlendis og hins vegar til þess að taka á móti flóttamönnum hér á landi,“ segir Kristinn.

Kristinn bendir á að stjórnvöld, Rauði krossinn og einstaklingar hafi átt í farsælu starfi um móttöku flóttamanna. Níu sveitarfélög hafi tekið á móti hópunum með góðum árangri og miklum sóma. „Minnistætt er hversu vel Ísfirðingar stóðu sig í erfiðu árferði í sjávarútvegi fyrir vestan og aðeins ári eftir mannskæð snjóflóð. Á þessum grunni á að halda áfram og bjóða flóttamönnum að koma til landsins og það án þess að horfa til þjóðfélagslegrar stöðu, kynþáttar eða trúarbragða,“ segir Kristinn.

Heimild: dv.is (http://dv.is/frettir/lesa/9267)

Anti-rasistar kæra Viðar fyrir meiðyrði

21. maí 2008

Félag anti-rasista hefur kært Viðar Guðjohnsen, formann Landssambands ungra frjálslyndra, fyrir meiðyrði. Dane Magnússon, formaður Félags anti-rasista, skilaði inn formlegri kæru þessa efnis til lögreglunnar á höfuðborgarsvæðinu í gær.

Í kærunni er einkum vísað til þeirra ummæla Viðars á bloggsíðu hans um að anti-rasistar vilji beita hann ofbeldi. Þar vísaði Viðar til athugasemdar Sveins Helgasonar við pistil á heimasíðu Viðars. Í athugasemdinni segir: „Dane og ég erum hvorki lygarar né hyski. Félag anti-rasista hefur engan þátt átt í árásunum gegn honum en það er mikið af fólki sem ég og Dane þekkjum sem vill ráðast á Viðar. Við höfum komið í veg fyrir þær árásir svo Viðar ætti bara að þakka okkur fyrir,“ sagði Sveinn.

Viðar bloggaði um þessi ummæli undir yfirskriftinni „Félagar anti-rasista vilja beita mig ofbeldi.“ Sveinn hafði á sínum tíma skrifað grein sem var birt á heimasíðu anti-rasista þar sem hann sagðist hafa séð Viðar dreifa miðum með merkjum nýnasistasamtakanna Combat 18 á tónleikum Bubba Morthens gegn rasisma. Viðar hefur aftur á móti ávallt vísað þeim fullyrðingum á bug.

Dane segir Svein ekki skráðan meðlim í Félagi anti-rasista. Hann hafi einfaldlega leitað til félagsins þar sem hann taldi sig hafa verið vitni að því þegar Viðar dreifði miðunum. Hann segir Viðar hafa markvisst komið slæmu orði á félagið og því hafi stjórn þess ákveðið að kæra ummælin. „Þetta kemur sér illa fyrir félagið sem vinnur meðal annars að fræðslu við börn um fordóma,“ segir Dane.

Auk þessa segir Dane að Viðar hafi reynt að bendla félagið við atvik sem séu því ótengd eins og eggjakast í húsið hans og dreifingu áróðursmiða í hverfinu hans þar sem segir að í götunni búi rasisti.

Viðar segist hafa túlkað ummæli Sveins á heimasíðu sinni á þennan veg þar sem Sveinn segist auk Dane þekkja marga sem vilji ráðast á sig. „Þetta er komið út fyrir allar hellur og skil ég ekki ef þeir tilkynna það ekki til lögreglunnar ef þeir þekkja einhvern sem vill ráðast á mig. Þetta hlýtur líka að vera ámælisvert þar sem þarna er vitnað í Dane í athugasemdinni, en hann er formaður félagsins. Mér þykir það undarlegt eftir allt sem á undan er gengið að þeir leggi fram kæru gegn mér,“ segir Viðar.

Heimild: dv.is (http://dv.is/frettir/lesa/9147)

Flóttamönnum vel tekið

21. maí 2008

Guðrún Ögmundsdóttir, formaður flóttamannaráðs, segir að móttaka flóttamanna hafi ávallt gengið vel og þeir hafi aldrei fundið fyrir fordómum af hálfu Íslendinga. Hún harmar jafnframt neikvæða umræðu meðal sumra á Akranesi.

 

Íslendingar tóku fyrst á móti flóttamönnum með skipulögðum hætti árið 1956 þegar hingað komu 52 Ungverjar sem höfðu flúið undan innrás Sovétríkjanna í landið. Fram til ársins 1991 bættust um 150 manns í hópinn, tæplega 100 frá Víetnam auk hópa frá Júgóslavíu og Póllandi. Alls hafa Íslendingar því tekið á móti tæplega 500 flóttamönnum frá árinu 1956.

 

Sú staða sem upp er komin á Akranesi, þar sem bæjarfulltrúi Frjálslynda flokksins, Magnús Þór Hafsteinsson, hefur haft forystu um að mótmæla komu flóttamannanna og þar sem undirskriftum er safnað í sama tilgangi, er algjört einsdæmi hér á landi. Aldrei áður hefur komu flóttamanna verið mótmælt með þessum hætti.

 

Í texta undirskriftalistanna segir m.a. að þeir sem skrifi undir telji að velferðarkerfi bæjarins, leikskólar, grunnskólar og heilbrigðis- og félagsmálakerfi sé ekki í stakk búið til að takast á við slíkt verkefni. Þessu hafnar Gísli S. Einarsson bæjarstjóri alfarið og segir bæjarfélagið vel í stakk búið til að taka á móti flóttamönnunum. Hann benti auk þess á að Akurnesingum hefði fjölgað um 30 á hverjum mánuði að meðaltali síðasta eina og hálfa árið. Komi 20 börn með mæðrum sínum, eins og hugsanlegt er, sé pláss fyrir þau í skólunum og lítið muni um þessa fjölgun.

 

Það má líka benda á að á árunum 2000-2007 fjölgaði íbúum á Akranesi um rúmlega 900 eða úr 5.433 í 6.345. Að meðaltali fjölgaði Akurnesingum því um 130 á hverju ári. Palestínsku flóttamennirnir sem bætast í þennan hóp í haust verða 30. Fólkið kemur frá Al Waleed-flóttamannabúðunum í Írak þar sem það býr við erfiðar aðstæður.

 

 

Heimild: mbl.is (http://mbl.is/mm/frettir/innlent/2008/05/21/flottamonnum_vel_tekid/)

Múslimar óvelkomnir

20. maí 2008

Fundarmenn sem sátu fund bæjarmálafélags Frjálslyndaflokksins á Akranesi á annan í hvítasunnu, segja að sér hafi verið misboðið að heyra grímulausan kynþáttaáróður sem þar fór fram vegna umræðu um að Akranes tæki á móti þrjátíu flóttamönnum frá Palestínu. Þau segja ótrúlegt að heyra Magnús Þór Hafsteinsson og félaga hans í Frjálslynda flokknum tala í fjölmiðlum, miðað við orðræðuna sem notuð var á fundinum.


„Það er mitt mat eftir að hafa setið fundinn, að þar sem þetta fólk er að þeirra sögn múslimar, þá komi það ekki til greina að þeir komi á Akranes,“ segir Jón Sigurðsson sem hingað til hefur stutt Frjálslynda flokkinn. Jón segist hafa spurt á fundinum, hvort ekki væri réttast að fá upplýsingar um trúarbrögð fólksins í stað þess að gefa sér það fyrirfram.

„Það var hins vegar ekkert hlustað á mig með það og mitt mat eftir fundinn var að ef þetta væru Evrópubúar, þá væri málið allt annað, en þar sem þetta eru Palestínumenn, þá kemur það ekki til greina að þeir komi til bæjarins.“ Hann gefur lítið fyrir það hvernig frjálslyndir hafa komið fram í fjölmiðlum að undanförnu eftir að hafa heyrt það sem fram fór á fundinum. „Þau rök sem Magnús Þór og aðrir frjálslyndir hafa fært í þessu máli eru eintómt yfirklór,“ segir hann. Aðspurður um hvort hann hafi orðið var við rasisma á umræddum fundi svarar hann: „Ég vil ekki vera að nota slík orð yfir fólk, en þetta hljómar að minnsta kosti þannig.“

Magnús hótaði að slíta meirihlutanum

 Helga Jónsdóttir, sem sótti fund Bæjarmálafélagsins á annan í hvítasunnu tekur undir orð Jóns. „Af orðum Magnúsar og hans aðstandenda að dæma, fannst þeim ekki tímabært að fá útlendinga hingað og alls ekki af því að þeir voru þessarar trúar. Þeir tóku það skýrt fram að þetta fólk myndi aldrei aðlagast hér á landi af því að þeir voru múslimar,“ segir hún.

Helga segir Magnús Þór jafnframt hafa hótað því sjálfur að slíta meirihlutasamstarfinu. „Á þessum fundi sagðist hann aldrei samþykkja það að þetta fólk kæmi hingað og hann sagði orðrétt að fyrr myndi hann sprengja meirihlutasamstarfið,“ segir hún og bætir við: „Hann fer hér um bæinn og eitrar hugi fólks með, með því að hræra staðreyndum saman og hræða fólk með hlutum sem ekki er fótur fyrir. Okkur hreinlega blöskraði margt það sem sagt var um innflytjendur á þessum fundi. Ég vona að fólk taki sem best á móti þeim þegar þeir koma hingað.“

Minnist ekki ummælanna

Magnús Þór Hafsteinsson vísar því alfarið á bug að hann hafi staðið fyrir hræðsluáróðri vegna komu flóttamannanna til Akraness. Um það að hann hafi sagt að það kæmi aldrei til greina að flóttamennirnir kæmu til Akranes, svarar hann:

„Mig rekur ekki í minni að þetta hafi verið sagt og á þessum fundir var ekiki færð nein fundargerð.“ Aðspurður um hvort rétt sé að hann hafi hótað því að sprengja meirihlutann, svarar hann því að það sé ekki í verkahring annars manns á lista að gera það. „Hins vegar er það alveg ljóst að fyrst Karen Jónsdóttir ætlaði sem oddviti að ganga gegn yfirgnæfandi meirihluta listans, þá er hún komin í andstöðu við eigin lista og það er eins í öllum stjórnmálaflokkum að það kallar á vandræði,“ segir hann. Magnús neitar því að hafa staðið að undirskriftarlista sem liggur fyrir á Akranesi gegn komu flóttamannanna til bæjarins.

„Ég hef heyrt af þessum undirskriftarlista en hann er algjörlega ópólitískur og hefur ekkert með Frjálslynda flokkinn að gera, en ég mun skrifa á nafn mitt á listann."

http://dv.is/frettir/lesa/9038

Segir anti-rasista hóta ofbeldi

19. maí 2008

Viðar Helgi Guðjohnsen, formaður Landssambands ungra frjálslyndra, segir meðlimi Félags anti-rasista hóta sér ofbeldi. Í pistli á heimasíðu sinni segir Viðar frá því að Sveinn Helgason, meðlimur Félags anti-rasista, hafi skrifað þar ógnvekjandi athugasemd. Í pistlinum vitnar Viðar beint í ákveðinn hluta athugasemdarinnar. Þar segir: „Dane og ég erum hvorki lygarar né hyski. Félag anti-rasista hefur engan þátt í árásunum gegn honum (Viðari) en það er mikið af fólki sem ég og Dane þekkjum sem vilja ráðast á Viðar. Við höfum komið í veg fyrir þær árásir svo Viðar ætti bara að þakka okkur fyrir,“ skrifar Sveinn og vísar í athugasemdinni til Dane Magnússonar, formanns Félags anti-rasista.

Viðar skrifar um þessa athugasemd á heimasíðu sína undir fyrirsögninni „Félagar anti-rasista vilja beita mig ofbeldi.“ Sveinn hefur sagt Viðar hafa tekið þátt í því að dreifa miðum með merkjum nýnasistahreyfingarinnar Combat 18 á tónleikum Bubba Morthens gegn rasisma. Viðar hefur aftur á móti vísað þeim ásökunum á bug, en hann var gestakynnir á umræddum tónleikum.

Magnús Þór Hafsteinsson, varaformaður Frjálslynda flokksins, er meðal þeirra sem skrifa við pistil Viðars. Þar segir Magnús Þór: „Þetta er alvarlegt mál. Hótanir undir rós. Lögreglan ætti að kalla þessa félaga, þá Dane og Svein til yfirheyrslu strax á morgun,“ segir Magnús.

Talsverðar ritdeilur hafa verið að undanförnu milli Landsambands ungra frjálslyndra og Félags anti-rasista. Í síðustu viku sagði Viðar frá því að húsið hans hefði verið grýtt með eggjum. Hann sagði þá frá því bifreið hefði verið lagt fyrir utan húsið, hópur fólks stigið út og kastað eggjum í húsið. Bróðir Viðars náði niður skráninganúmeri bifreiðarinnar. Í síðasta mánuði var svo bréfi dreift í hverfi Viðars þar sem sagt var að rasisti byggi í hverfinu. Samtökin Í-P Action Group, Chapter Reykjavík voru þá skrifuð fyrir bréfinu. Spurningar hafa vaknað um hvort Félag anti-rasista standi á bakvið þessar aðgerðir en Dane hefur þó þvertekið fyrir það.

Í samtali við dv.is segir Dane meðlimi Félags anti-rasista ekki hóta einum eða neinum ofbeldi eins og Viðar gefi í skyn. „Það eina sem við gerum er að verja okkur með blaði og penna. Mér finnst hann nota félagið til að koma sér áfram í pólitík. Sveinn var vitni að einhverju á tónleikunum sem hann er frjáls til að segja frá. Mér finnst mjög slæmt að hann sé að saka okkur um ofbeldi. Hlutverk félagsins er að búa til fræðslu efni og aðstoða fólk sem hefur orðið fyrir einelti, fordómum og árásum,“ segir Dane sem segir Sveini sjálfum hafa borist hótanir fyrir að segja sögu sína.

Heimild: dv.is (http://dv.is/frettir/lesa/8969)