Fékk ekki bréf um brottvísun úr landi

03. júlí 2008

Paul Ramses fékk ekki að sjá bréf um synjun á beiðni um hæli fyrr en í gærkvöldi. Bréfin hefðu átt að berast honum í apríl. Eiginkonu Paul finnst þetta ótrúleg vinnubrögð.

„Ég skil þetta bara ekki," segir Atieno Othiembo, eiginkona Pauls. „Ég hef ekkert heyrt frá honum síðan í morgun á flugvellinum, ég veit ekkert hvort hann sé kominn til Ítalíu eða hvort hann hafi millilent einhvers staðar."

Paul var greint frá því í gær að umókn hans um stöðu flóttamanns á Íslandi yrði ekki afgreidd heldur yrði hann sendur með flugi næsta morgun til Ítalíu. Gisti hann fangageymslur lögreglunnar í nótt.

Þetta hefði hann átt að fá að vita í þremur bréfum sem hefðu átt að berast honum í apríl. Eiginkona Pauls og Þórunn Helgadóttir hjá ABC barnahjálp, vinkona þeirra hjóna, fullyrða báðar að bréfin hafi ekki borist.

„Um er að ræða þrjú bréf. Í fyrsta bréfinu er ákvörðun stjórnvalda um að synja beiðni hans um að fjalla um málið hérhæli. Bréfið er mest á íslensku en ein klausa á ensku," segir Þórunn.

Hún segir að efni annars bréfsins hafi verið upplýsingar um kærufrest. Paul hafi haft 15 daga til þess að áfrýja. Þórunn segir að miðað við þær upplýsingar sem aðstandendur Pauls hafi undir höndum virðist Paul ekki hafa haft færi á því að fara með mál sitt fyrir dómstóla.

„Þriðja bréfið er birtingavottorð, staðfesting á því að hann hafi tekið við þessu og þar á Paul Ramses að hafa skrifað undir ásamt vottum. Útlendingastofnun tjáði þeim í dag að Paul hefði fengið að vita þetta fyrir tveimur mánuðum en hvorki hann né aðrir kannast við það og ekkert bréf hafði borist heimilinu," segir Þórunn.

Eiginkona Paul óttast um öryggi hans.

,,Hann er mjög stressaður, við vitum ekkert hvernig við eigum að sjá fyrir okkur, barnið okkar er rúmlega sex vikna þannig að ég get ekki unnið. Ef Paul getur ekki komið aftur til Íslands reynum við örugglega að fara til Ítalíu," segir Atieno.

Heimildir: visir.is (http://visir.is/article/20080703/FRETTIR01/219093923)

Flugvallahlauparar fámálir

03. júlí 2008

Búið er að yfirheyra mennina sem hlupu út á flugbraut í morgunn. Þeir voru þöglir sem gröfin við skýrslutöku og gáfu ekki upp ástæðu gjörða sinna.

"Það er búið að yfirheyra þá. Nú verður reynt að ljúka rannsókn sem fyrst og málið svo sent ákæruvaldinu," segir Eyjólfur Kristjánsson, fulltrúi lögreglustjórans á Suðurnesjum.

Mennirnir, sem eru báðir á þrítugsaldri, hlupu inn á flugbrautina við Flugstöð Leifs Eiríkssonar klukkan kortér í átta í morgun. Þeir voru umsvifalaust handteknir. Í upphafi var talið að mennirnir væru að mótmæla brottför Keníamannsins Paul Ramses, sem fluttur var til Ítalíu í morgun.

Eyjólfur sagði að ekkert hefði komið fram við yfirheyrslur sem styddi þá fullyrðingu. "Þeir gáfu engin svör," segir hann.

Heimildir: visir.is (http://visir.is/article/20080703/FRETTIR01/739182399)

Ekkert ólögmætt við að beita Dyflinnarsamningnum

03. júlí 2008

Björn Bjarnason dóms-og kirkjumálaráðherra segir ekkert ólögmætt né athugavert við að beita Dyflinnarsamningnum frekar en öðrum milliríkjasamningum. Þetta kemur fram í svari hans við spurningum Vísi um mál Keníumannsins Pauls Ramses og starfsemi Útlendingastofnunar. Ramses sótti um stöðu flóttamanns á Íslandi en var vísað af landi brott til Ítalíu á grundvelli Dyflinnarsamkomulagsins í gærkvöldi.

Paul Ramses var kosningastjóri stjórnarandstöðunnar í Kenía en sótti um stöðu flóttamanns í febrúar eftir að átök brutust ú í kjölfar forsetakosninga sem voru þar í landi í desember. Kom fram í viðtali við hann í á Stöð 2 í febrúar að hann væri á aftökulista yfirvalda þar í landi.

Vísir sendi Birni nokkrar spurningar varðandi umsókn Paul Ramses og starfsemi og vinnureglur Útlendingastofnunar. Í fyrsta lagi hvort ekki þyrfti að stytta afgreiðslutíma umsókna um stöðu flóttamanns á Íslandi. Í öðru lagi hvort ekki væri hægt að veita máli hans einhvers konar flýtimeðferð á grundvelli þess að hann á fjölskyldu á landinu. Í þriðja lagi hvort ekki ætti að beita því úrræði sem felst í Dyflinnarsamningnum, að senda flóttamann til þess lands á Schengen-svæðinu sem hann kom fyrst til, frekar sem undantekningu en sem reglu.

Svar Björns var þetta: „(H)vert mál er skoðað fyrir sig af útlendingastofnun, hún leggur mat á umsóknir og kemst að niðurstöðu um afgreiðslu þeirra. Ef fólk er ósátt við þá niðurstöðu er unnt að kæra hana til ráðuneytisins og/eða leita til umboðsmanns alþingis og dómstóla vegna málsins. Réttarstaða útlendinga hér á landi er skýr og á síðasta þingi sameinaðist alþingi um breytingar á útlendingalögum til að skýra þessa stöðu enn betur. Dyflinarsamningurinn er einnig skýr og honum er beitt af aðildarríkjum hans. Að sjálfsögðu er ekkert ólögmætt eða athugavert að beita þeim samningi frekar en öðrum milliríkjasamningum."

Hann benti einnig á að umsvif Útlendingastofnunar hefðu verið mikil undanfarin misseri vegna hins mikla fjölda útlendinga sem kemur til landsins. ,,Ég fullyrði hins vegar, að almennt séð megi færa góð rök fyrir að skilvirkni við afgreiðslu slíkra mála hér stenst mjög vel samanburð við það, sem best gerist í Evrópu eða annars staðar," skrifaði Björn að lokum í svarinu til Vísis.

Heimildir: visir.is (http://visir.is/article/20080703/FRETTIR01/262609523)

Mótmæla meðferð á flóttamanni

03. júlí 2008

Samtökin AUS, Alþjóðleg ungmennaskipti, hafa sent frá sér yfirlýsingu þar sem þau mótmæla þeirri meðferð sem þau segja Paul Ramses, pólitískan flóttamann frá Kenía, hafa hlotið af hálfu Útlendingastofnunar.

 

Fram kemur í yfirlýsingunni að Ramses hafi komið til Íslands á vegum AUS árið 2005 og unnið hér sem sjálfboðaliði í eitt ár. Hann  hafi síðan aftur farið til  Kenía og m.a. starfað fyrir ABC barnahjálp þar. Þá hafi hann tekið þátt í stofnun skóla þar sem naut stuðnings utanríkisráðuneytisins.

 

Hann hafi síðan boðið sig fram fyrir hönd stjórnmálaflokks sem tapaði í kosningunum í Kenía í desember og því sé óttast um líf hans fari hann aftur til þangað.

 

Ramses var handtekinn í Reykjavík gær og fluttur til Ítalíu í morgun en hann millilenti þar á leið sinni hingað til lands í upphafi árs.

 

Segir í yfirlýsingu AUS að samtökin telji Útlendingastofnun vera að firra sig ábyrgð á manninum með því að senda hann til Ítalíu og að mun eðlilegra hefði verið að umsókn hans hefði fengið málsmeðferð hér. Hér á landi liggi fyrir ýmis gögn um pólitískar ofsóknir á hendur honum í Kenía auk þess sem tengsl hans við Ísland séu talsverð. Á Ítalíu sé ekki um neitt slíkt að ræða.

 

Heimild: mbl.is (http://www.mbl.is/mm/frettir/innlent/2008/07/03/motmaela_medferd_a_flottamanni/)

„Furðum okkur á ákvörðun yfirvalda“

03. júlí 2008

Jóhanna K. Eyjólfsdóttir, framkvæmdastjóri Íslandsdeildar Amnesty International, furðar sig á ákvörðun yfirvalda að senda Keníubúann Paul Ramses aftur til Ítalíu á grundvelli Dyflinnarsamkomulagsins í stað þess að umsókn hans til stöðu flóttamanns sé tekin til umfjöllunar hér á landi.

,,Við spyrjum okkur hvort íslensk stjórnvöld hafi athugað hvernig aðbúnaður hælisleitenda eru á Ítalíu þar sem þúsundir sækja um stöðu flóttamanna á ári hverju," segir Jóhanna. ,,Aðeins örfáir sækja um hér á landi ár hvert en Paul Ramses mun líklegast lenda aftast í röðinni á Ítalíu. Umsóknarferlið er langvinnt á Ítalíu og aðbúnaður þeirra sem bíða eftir úrskurði þar hefur verið gagnrýndur."

Jóhanna bendir á að Ísland sé bundið flóttamannasamningi Sameinuðu Þjóðanna sem þýðir að allir eigi rétt á að leita skjóls og hælis ef þeim er ekki vært í heimalandi sínu. Dyflinnarsamkomulagið sem er á milli Schengen-ríkjanna í Evrópu gerir Íslandi hins vegar kleift að vísa hælisleitendum aftur til þess Evrópulands sem þeir komu fyrst til. ,,Ekki er skylda að nota samninginn, aðeins heimild en Íslendingar hafa verið duglegir að beita þessari heimild til að komast hjá því að fjalla um einstök mál, það er í rauninni rauður þráður í meðhöndlun yfirvalda á málum hælisleitenda," segir Jóhanna.

,,Það sem ég furða mig einnig á er að ekki sé tekið tillit til sérstakra aðstæðna mannsins, að hann eigi konu og son hér á landi en í öllum mannréttindasamningum er kveðið á að stuðla eigi að sameiningu fjölskyldna eins og kostur er þegar veitt eru hæli. „Þar sem verið er að senda hann aftur til Ítalíu get ég ekki séð að það stuðli að sameiningu fjölskyldunnar," segir Jóhanna en kona Paul Ramses er með dvalarleyfi í Svíþjóð.

Að sögn Jóhönnu hafa Íslendingar verið duglegir að taka á móti kvótaflóttafólki sem þegar hafa fengið stöðu flóttamanns á vegum Sameinuðu Þjóðanna. Einstaklingar sem koma hingað fá hins vegar mjög sjaldan stöðu flóttamanns, á undanförnum árum hefur aðeins einn sem komið hefur hingað á eigin vegum hefur fengið stöðu flóttamans.

Dyflinnarsamkomulagið gerir ráð fyrir að fyrsta Evrópulandið sem flóttamaður kemur til fjalli um hælisbeiðnina en aftur á móti geta önnur Evrópuríki fjallað um umsóknina að eigin vild.

Heimildir: visir.is (http://visir.is/article/20080703/FRETTIR01/544996482)