Katrín búin að kæra

09. júlí 2008

Katrín Theódórsdóttir lögfræðingur Paul Ramses er búin að leggja inn kæru vegna synjunar Útlendingastofnunar á efnismeðferð í máli hans.

Katrín ætlar að krefjast þess að ákvörðunin um synjun verði dæmd ógild og að ný meðferð verði hafin á grundvelli þess að ekki hafi verið rétt staðið að ákvörðunartökunni.

Vísir náði tali af Katrínu þegar hún var á leiðinni í dóms-og kirkjumálaráðuneyti. Að hennar sögn gekk vel að útbúa kæruna.

„Já, en það felst svolítil vinna í að útbúa svona kæru," segir Katrín.

Heimildir: visir.is (http://visir.is/article/20080709/FRETTIR01/449223545)

Keníamenn eru enn óttaslegnir

09. júlí 2008

Átökin í Kenía hófust að loknum kosningum í janúar 2008. Í mars höfðu um 500.000 manns flúið heimili sín, segir Nairobi Chronicle (NC).
Í lok febrúar höfðu stjórnarflokkarnir byrjað að fínpússa samkomulag um endanlega valdaskiptingu í landinu.
Þann 18. mars sögðu formenn tveggja stærstu flokkanna að nú yrði reynt að koma landinu til bjargar. Deila þeirra um hvor ætti að vera forseti hafði komið ofbeldinu af stað og inn í hana flæktist barátta ættbálka í landinu.
BBC greindi frá því um miðjan maí að kenískir flóttamenn í Úganda væru enn óttaslegnir og þyrðu ekki að fara heim til sín, þrátt fyrir yfirlýst friðarsamkomulag. Þá voru um 12.000 flóttamenn þar.
Ríkisstjórnin hefur hvatt þá til að snúa aftur og heitir því að hún geti tryggt öryggi í landinu.
NC greindi svo frá því í lok síðasta mánaðar að foringja flóttamanna í Nakuru hefði verið rænt og hann pyntaður. Tveir liðsmanna hans hefðu mótmælt þessu og væru í lífshættu, eftir að þeir hefðu verið skotnir af lögreglu.
Foringinn, Peter Kariuki, kom svo aftur, brunninn í framan. Hann lýsti því hvernig sýru hefði verið fleygt í andlit sitt og hann barinn. Mennirnir sem rændu honum hefðu ásakað hann um að letja flóttamenn í að snúa aftur til Kenía.
Stjórnvöldum mun afar annt um að loka öllum flóttamannabúðum, og eru sögð óttast að þau verði að gróðrarstíu fyrir uppreisnarmenn.

Heimildir: visir.is (http://www.visir.is/article/20080709/FRETTIR02/463624814)

Kæra vegna Paul Ramses hefur ekki borist ráðuneyti

08. júlí 2008

 

Fundi allsherjarnefndar Alþingis var að ljúka.  Á honum kom meðal annars fram að kæra vegna máls Paul Ramses hefur ekki borist dómsmálaráðuneytinu. Komi hún þangað mun hún verða tekin til gaumgæfilegrar skoðunar.

 

Ágúst Ólafur Ágústsson, varaformaður nefndarinnar, sagði nefndina hafa fengið betri upplýsingar um málið frá þeim aðilum sem nefndin kallaði á fund sinn. Á honum voru fulltrúar dómsmálaráðuneytis, Útlendingastofnunar, Amnesty, Rauða krossins og Alþjóðahúss.

 

Á fundinum var sömuleiðis rætt almennt um stöðu hælisleitanda á Íslandi og löggjöf sem þá varða.

 

Þá hefði komið fram frá fulltrúum dómsmálaráðuneytis að kæra vegna máls Paul Ramses hefði enn ekki borist ráðuneytinu en lögmaður Paul Ramses, Katrín Theodórsdóttir segir að kæra muni berast í dag eða morgun.

 

Ágúst segir að ef kæra verði send ráðuneytinu muni hún verða skoðuð gaumgæfilega og þar með verði boltinn hjá þeim. Þá verði málið opið á ný. Fyrst kæran hefur ekki borist þá er boltinn enn hjá lögmanni Paul Ramses.

 

Margir þeirra gesta sem komu á fundinn töldu að endurskoða þyrfti ákvörðun Útlendingastofnunar en það lægi þó nokkuð ljóst fyrir að málsmeðferðarreglur hefðu ekki verið brotnar. Allur ferill málsins hefði verið með eðlilegum hætti.

 

„Það er svo annað mál hvort að þessi ákvörðun hafi verið rétt vegna sérstakra tengsla mannsins við landið, bæði út frá mannúðarsjónarmiðum og eins vegna þess að þarna var fjölskyldu sundrað,“ segir Ágúst.

 

Ágúst segir að ef ráðuneytið fái kæru vegna Paul Ramses hafi ráðuneytið þrjá valkosti:

 

1. Ráðuneytið getur ógilt ákvörðun Útlendingastofnunar á grundvelli þess að reglur hafi verið brotnar.

 

2.  Ráðuneytið getur staðfest ákvörðun stofnunarinnar.

 

3. Dómsmálaráðuneytið getur snúið við ákvörðun Útlendingastofnunar og kveðið á um nýja ákvörðun. Þá lætur það framkvæma efnislegt mat á stöðu einstaklingsins en það hefur ekki verið gert.

 

Ágúst Ólafur sagði í viðtali við Morgunblaðið í gær  að það væri skoðun sín að dómsmálaráðherra ætti aðendurskoða ákvörðun Útlendingastofnunar og hafa mannúðarsjónarmið íhuga. „Ég tel það mikilvægt og sýnist svigrúm fyrir hann að gera það,“sagði Ágúst.

 

Ágúst Ólafur sagðist ekki hafa séð ástæðu til þess að nefndin sendi frá sér sameiginlega yfirlýsingu vegna málsins. Einstakir nefndarmenn gætu gert það og hefðu gert það. 

 

 

 

Heimild: mbl.is (http://mbl.is/mm/frettir/innlent/2008/07/08/kaera_vegna_paul_ramses_hefur_ekki_borist_raduneyti/)

,,Þetta mál þolir enga bið

08. júlí 2008

Atli Gíslason, þingmaður Vinstrihreyfingarinnar - græns framboðs telur farsælast að leitað yrði sátta við Útlendingastofnun í máli Paul Ramses. Kærumeðferð hjá dómsmálaráðuneytinu gæti tekið einhverja mánuði að hans sögn. ,,Grundvallaratriðið er að þetta mál þolir enga bið, þarna er verið að stía fjölskyldu í sundur," segir Atli.

,,Það er ekki gætt að hagsmunum barnsins í málinu en það er andstætt öllum mannréttindasáttmálum sem ég þekki og meira að segja Dyflinnarsamkomulaginu sjálfu," segir Atli.

Hann telur að Útlendingastofnun hefði átt að taka málið til efnismeðferðar að sjálfsdáðum og afgreiða mál allrar fjölskyldunnar saman.

,,Við lögðum til breytingar á lögum um útlendinga á síðasta þingi sem fólust í að hælisleitendendur fengu að vera hér á landi á meðan mál þeirra væru til meðferðar hjá stjórnvöldum eða dómsvöldum. Ef þær breytingar hefðu farið í gegn hefði Ramses ekki veirð vísað úr landi. En það feldi stjórnarmeirihlutinn," segir Atli.

Að sögn Atla komu fram upplýsingar á fundi Allsherjarnefndar um að málsmeðferð hjá Útlendingastofnun hafi verið áfátt varðandi rökstuðning, upplýsingaskyldu og rannsóknaskyldu. Útlendingastofnun hefði meðal annars ekki athugað aðstæður á Ítalíu og hvort trygging væri fyrir því að Ramses yrði ekki sendur þaðan aftur til Keníu.

Heimildir: visir.is (http://visir.is/article/20080708/FRETTIR01/789922777)

Björn fagnar ákvörðun Ingibjargar Sólrúnar

07. júlí 2008

Björn Bjarnason dómsmálaráðherra fagnar þeirri ákvörðun Ingibjargar Sólrúnar Gísladóttur utanríkisráðherra að fela sendifulltrúa í Róm að hlutast til um mál Keníamannsins Pauls Ramses.

Á heimasíðu sinni gantast Björn með að líklega hafi hann verið of jákvæður í svörum sínum við spurningum fjölmiðla um ákvörðun Ingibjargar Sólrúnar ,,því að hvergi hef ég heyrt eða séð neitt haft eftir mér um þetta framtak," segir Björn og bætir við:

,,Í stuttu máli fagnaði ég því. Ég tók einnig fram, að Franco Frattini, utanríkisráðherra Ítalíu, hefði fram á þetta ár farið með Schengenmálefni sem einn af framkvæmdastjórnarmönnum ESB og varaforseti framkvæmdastjórnarinnar. Hann hefði því yfirburðaþekkingu á þessu sviði og þar á meðal á framkvæmd Dublinsamningsins. Auk þess þekkti hann til hér á landi og rödd Íslands ætti örugglega hljómgrunn hjá honum."

Björn bendir þó á að enginn sem þekki til evrópskra útlendingamála undrist að ríki fari að Dyflinnarsamningnum. ,,Ég hef áður bent á það hér á síðunni, að Grikkir standa frammi fyrir miklum vanda í þessu efni, því að hertar aðgerðir gegn ólöglegum innflytjendum í vesturhluta Miðjarðarhafs hefur leitt til mikillar fjölgunar þeirra í Grikklandi og á Kýpur," segir Björn.

Björn víkur hins vegar ekkert að áeggjan Ágúst Ólafs Ágústssonar, varaformanns Samfylkingarinnar, um að hann endurskoði ákvörðun Útlendingastofnunar í máli Ramses.

Heimildir: visir.is (http://visir.is/article/20080707/FRETTIR01/843194013)