Félag Anti-Rasista
Segja Fox fréttastofuna rasista
23. júlí 2008
Hópur fólks safnaðist saman fyrir utan skrifstofur Fox sjónvarpsstofunnar til þess að mótmæla fréttatflutningi stöðvarinnar sem hópurinn telur yfirfullan af rasisma, m.a. í garð Barack Obama, forsetaframbjóðanda Demókrataflokksins.
Hópurinn, sem samanstóð af um 150 manns, afhenti einnig forsvarsmönnum Fox undirskriftarlista frá um sex hundruð þúsund manns sem allir mótmæla fréttaflutningi stöðvarinnar. Meðal þeirra sem mótmæltu fyrir utan Fox var hip-hop stjarnan Nas.
Fox fréttastofan, sem er annálaður stuðningsmaður Repúblikanaflokksins, hefur ítrekað tengt Obama við hryðjuverk og gert grín að húðlit hans. Talsmaður Fox gaf lítið fyrir mótmælin en sagði að allir ættu rétt á að sýna sína skoðun.
Heimildir: visir.is (http://visir.is/article/20080723/FRETTIR02/282184033)
Erlendum nemum fjölgar ört í HÍ
22. júlí 2008
Erlendum nemum hefur fjölgað ört í Háskóla Íslands ef litið er til síðustu ára. Um 400 nemendur sóttu í ár um grunnnám við Háskóla Íslands að sögn Gísla Fannberg hjá kennslusviði HÍ en fyrir fimm árum voru um það bil helmingi færri umsóknir.
Er þetta svipaður fjöldi umsókna og í fyrra en þá var alger sprenging í aðsókn erlendra nemenda við skólann. 230 sóttu um skiptinám við skólann en skiptinemum hefur einnig fjölgað ört síðastliðin ár.
Mikill fjöldi þeirra sem sækir um grunnnám við HÍ sækir um íslensku fyrir erlenda stúdenta en alls sóttu 200 manns um það nám í fyrra og voru 100 teknir inn.
Gísli segir að til þess að geta stundað annað grunnnám við skólann sé frekar mikilvægt að kunna íslensku en sumir sæki þó um nám í eina önn eða eitt ár og geti þá nýtt sér þá kúrsa sem eru á ensku í skólanum. Tvær leiðir í mastersnámi eru komnar á ensku við HÍ en það er alþjóðalögfræði og miðalarfræði og eru þær leiðir vinsælar að sögn Gísla.
Flestir þeir sem koma hingað sem skiptinemar eru frá Finnlandi eða Þýskalandi en Þjóðverjar eru einkar hrifnir af Íslandi að sögn Ölmu Joensen hjá Alþjóðaskrifstofu háskólastigsins.
Vinsælustu fögin eru íslenska og jarðfræði en í síðarnefnda faginu eru fleiri námskeið kennd á ensku en í öðrum fögum vegna fjölda erlendra nema. Um 200 Íslendingar fara ár hvert í skiptinám erlendis og hefur sá fjöldi verið frekar stöðugur síðastliðin ár.
Heimildir: visir.is (http://visir.is/article/20080722/FRETTIR01/875280601)
Ramses fer í sturtu þrisvar á dag
22. júlí 2008
Paul Ramses bíður nú niðurstöðu dómsmálaráðuneytisins í Róm á meðan kona hans og barn dvelja hér á landi. Ramses segir frekar erfitt að vera í Róm ekki aðeins sé erfitt að vera fjarri fjölskyldu sinni heldur sé einnig mjög heitt þar. „Það er mun heitara hér en ég er vanur, það er meira að segja heitara hér en í Keníu. Ég þarf að fara í sturtu þrisvar á dag en í Keníu þurfti ég aldrei að fara í sturtu" segir Ramses.
Katrín Theódórsdóttir, lögfræðingur hans lagði fram kæru til dómsmálaráðuneytisins fyrir tæpum tveimur vikum vegna ákvörðunar Útlendingastofnunar um að synja því að hælisumsókn hans yrði tekin til umfjöllunar hér á landi.
Ef dómsmálaráðuneytið ákveður að hnekkja ákvörðun Útlendingastofnunar getur Ramses komið aftur til Íslands og verið hér á meðan stofnunin metur hvort hann fái stöðu flóttamanns. Ef ráðuneytið hins vegar staðfestir ákvörðun Útlendingastofnunar þá verður Ramses að leita hælis á Ítalíu.
Þegar Ramses frétti af rigningunni á Íslandi sagðist hann vel geta hugsað sér rigningu í Róm og bað um að fá smá sendingu af íslensku rigningunni.
Ramses segist drepa tímann á Ítalíu með því að reyna að læra ítölsku. „Það er samt mjög erfitt að reyna að læra þegar maður er svona stressaður. Ég reyni einnig að fara í göngutúra hérna í hverfinu þar sem ég bý, en það er bara svo heitt úti."
Ramses nefnir að sér hefði verið sagt að kæruferlið hjá dómsmálaráðuneytinu tæki tíma.
„Ef dómsmálaráðherrann kæmist fljótlega að niðurstöðu yrði ég hins vegar mjög þakklátur." sagði Ramses að lokum.
Heimildir: visir.is (http://visir.is/article/20080722/FRETTIR01/35293312)
Nelson Mandela níræður
17. júlí 2008
Hinn heimsþekkti Suður-Afríkumaður Nelson Mandela er níræður í dag. Mandela er þekktur fyrir að hafa barist gegn aðskilnaðarstefnu hvítra og svartra í Suður-Afríku og eytt 27 árum í fangelsi vegna þeirrar baráttu sinnar.
Árið 1990 var Mandela leystur úr fangelsi eftir alþjóðlegan þrýsting á Suður Afríku. Varð hann fyrsti svarti forseti Suður-Afríku árið 1994 en hafði þá fengið friðarverðlaun Nóbels fimm mánuðum áður fyrir baráttu sína gegn aðskilnaðarstefnu.
Nelson Mandela er án ef eitt þekktasta andlit Afríku og hafa persónutöfrar hans, fyndni, ótrúleg lífssaga og biturleysi gagnvart hörðum örlögum sínum vakið aðdáun allrar heimsbyggðarinnar.
Mandela hefur barist fyrir friðarviðræðum víða um heim, til dæmis í Afríkuríkjunum Kongó og Burundi en hann hefur einnig barist ötullega gegn þeirri vá sem HIV er Afríku.
Lífshlaup Mandela
Mandela fæddist árið 1918 í Madiba ættbálkinn í litlum bæ í austurhluta Suður-Afríku. Upprunalegt nafn hans var Rolihlahla Dalibhunga en kennari í skóla hans gaf honum enska nafnið Nelson. Mandela gekk í stjórnmálaflokkinn „African National Congress" betur þekktan sem ANC árið 1943 en hann átti síðar eftir að verða leiðtogi þess flokks.
1952 varð Mandela lögfræðingur og stofnaði lögfræðistofu með vini sínum Oliver Tambo og voru þeir félagar ötullir að berjast gegn aðskilnaðarstefnunni í landinu. Sú stefna var sett á stofn af hinum hvíta Þjóðernisflokk þegar Suður-Afríka fékk sjálfstæði sitt frá Bretlandi 1961. Var aðskilnaðarstefnan sett á til þess að kúga hinn svarta meirihluta landsins þrátt fyrir mikla andstöðu bæði innanlands sem utan.
ANC-flokkurinn hafði verið bannaður árið 1960 og varð að andspyrnuflokki og magnaðist spennan í landinu vegna aðskilnaðarstefnunnar. Leiddi það til þess að Mandela var handtekinn og sakaður um skemmdarverk og fyrir að reyna að ræna völdum. Hófst hinn 27 ára fangelsisdvöl að vetri til 1964. Á árunum 1968-69 dó bæði móðir Mandela og sonur hans en honum var ekki leyft að vera við jarðarfarir ástvina sinna.
Fleiri andspyrnumenn þurftu að dúsa í fangelsi á þessum tímum eða í útlegð en andspyrnan hélt áfram sem leiddi til dauða mörg hundruð manna auk þess sem mörg þúsund manns særðust.
1980 fór Tambo vinur Mandela í alþjóðlega herferð til þess að þrýsta á stjórnvöld í Suður-Afríku að leysa Mandela úr haldi. Varð það til þess að 1990 varð hann leystur úr haldi þrátt fyrir að vera dæmdur til fangelsisvistar fyrir lífstíð.
1994 var hann svo kosinn forseti í fyrstu lýðræðislegu kosningum landsins þar sem allir fengu að taka þátt. Sem forseta beið hans mörg vandamál, meðal annars mikið húsnæðisvandamál sem var á meðal fátækra íbúa landsins. Hann treysti sínum næstráðandi Thabo Mbeki fyrir daglegum rekstri landsins en einbeitti sér að því að breyta ímynd Suður-Afríku út á við.
Árið 1999 hætti hann sem forseti og ferðaðist um heiminn sem opinber persóna en 2004 dró hann sig í hlé til að vera með fjölskyldu sinni. 2005 kom hann hins vegar fram opinberlega eftir dauða sonar síns og lýsti því yfir að sonur hans hafi látist af alnæmi en hneyklsi þótti að ræða þetta vandamál í Suður-Afríku og víðar í Afríku.
Nýlega voru haldnir stórtónleikar í London til þess að fagna þessum tímamótum í lífi Mandela þar sem margar stórstjörnur komu fram auk þess sem hann hefur fengið sendar afmælisóskir hvaðanæva úr heiminum.
Þessar upplýsingar eru fengnar af fréttavef BBC og frjálsa alfræðiritinu Wikipedia.
Heimildir: visir.is (http://visir.is/article/20080717/FRETTIR02/249530400)
Paul harmar ummæli ættingja
12. júlí 2008
„Útlendingastofnun getur sannað mál mitt, þeir eru með vitnisburð Íslendinga sem vita að ég var í hættu. Ég veit varla hvað skal segja um ættingja mína, nema kannski að þau hafa ekki farið til Kenía í langan tíma," segir Paul Ramses flóttamaður.
Í fréttum Stöðvar 2 í gær var viðtal við þrjá ættingja hans, sem sögðu að Paul væri ekki í hættu í Kenía. Hann hefði skáldað sögu sína til að fá hæli.
„Það getur auðvitað vel verið að eitthvað hafi breyst í Kenía síðan ég sótti um hæli í janúar. En það breytir því ekki að meira en þúsund manns hafa verið myrt síðan ég fór," segir hann.
Paul harmar ummæli ættingjanna og það að hann valdi fólki hugarangri. Hann hafi heyrt af fólki sem saki hann um, meðal annars, að stela frá Fíladelfíu-söfnuðinum.
„Fólk spyr ekki af hverju presturinn hafi ekki kært mig. Kona hans hóf söfnunina og ég gerði búninga handa munaðarlausum börnum fyrir féð," segir hann.
Spurður nánar út í ásakanirnar og nafnlaus skrif, sem birst hafa á netinu, segir Paul:
„Ég er kristinn og vil helst ekki tala um þetta. Oft þegar fólk gerir mistök, er það að gera það sem það telur sig í raun og veru þurfa að gera. Oft segir fólk eitthvað til að taka þátt í hlutunum. Mahatma Gandhi sagði að stundum væri best að þegja. Ég ætla að gera það." - kóþ
Heimildir: visir.is (http://visir.is/article/20080712/FRETTIR01/929942295)
Tenglar
Fréttir
Styrktaraðilar
