Frjálslyndur rasismi

02. des 2006

Smári Karlsson.- bb.is

Frjálslyndur rasismi

Það var sannkölluð skítabomba sem utanveltubesefinn Jón Magnússon og fóstbróðir hans Magnús Þór Hafsteinsson vörpuðu inn í íslenskt samfélag. Og rétt eins og mý laðast að mykjunni skríða íslenskir rasistar út úr skápum sínum og dást að röggsemi þeirra, dást að því að loksins þori einhver að taka á útlendingavandanum. En hver er þessi vandi? Þarf ekki að vera vandamál til þess taka á? Vandinn á meðal annars að vera sá að útlendingar streymi til landsins og taki vinnu af Íslendingum, þeir eiga víst að lækka launin fyrir utan að vera óalandi og óferjandi hyski ef mark er tekið á ýmsum greinarskrifum sem birst hafa í blöðunum undanfarnar vikur.

Það er 2,6 prósent atvinnuleysi á Íslandi, á máli fræðinganna kallast það ekkert atvinnuleysi. Ef útlendingar eru að „taka” vinnu frá Íslendingum þá geri ég ráð fyrir að einhversstaðar séu ráfandi hópar af atvinnulausum Íslendingum en svo er ekki. Eftir stendur er að atvinnuleysið er 2,6 prósent og því algjör firra að halda fram að einhver sé að taka vinnu frá einhverjum. Hvort útlendingar hafa valdið launalækkun skal ég ósagt látið, mig skortir einfaldlega þekkingu á því en eftir því sem ég best veit hafa laun ekki lækkað undanfarin ár og misseri og því varla hægt að kenna útlendingum um glæp sem ekki var framinn. Þegar rýnt er í málflutning Frjálslynda flokksins og farið yfir helstu röksemdir þeirra í málefnum innflytjenda stendur fátt eftir nema illa dulbúinn rasismi. Jón utanveltubesefi hefur m.a. sagt að meira að segja 50.000 Norðmenn eða 100.000 Danir sem flyttust til landsins væri of mikið, málið snýst semsagt um kynþætti. Danir og Norðmenn eru betri en Rúmenar, Pólverjar og Lettar. Hann virðist haldinn sömu aðdáun á hinum norræna kynstofni og nasistar Þriðja ríkisins ásamt því að deila skoðunum þeirra á íbúum Austur Evrópu.

Ísafjarðarbær er að mörgu leyti heimabær Frjálslynda flokksins, fylgi hans er mikið í bænum og formaðurinn er Ísfirðingur. Á sama tíma er hlutfall erlendra ríkisborgara í Ísafjarðarbæ með því hæsta sem gerist á landinu. Við Ísfirðingar þurfum að senda skýr skilaboð hvað okkur finnst um málflutning íslenskra rasista og þeir leynast víðar en bara í Frjálslynda flokknum. Vissulega fylgja einhver vandamál því þegar svo miklar breytingar verða á samfélaginu eins og hafa orðið undanfarin ár en þau eru hjóm eitt samanborið við ávinninginn og tækifærin sem fjölbreyttara samfélag færir okkur.

Frjálslynda flokknum hefur með afskræmingu á staðreyndum og ógeðfelldu lýðskrumi sínu tekist að lyfta fylgi sínu upp í 11 prósent tvo þjóðarpúlsa í röð. Flokkurinn var nær örenda þegar Magnús brá sér í sjömílnaskóna, stríðið gegn kvótanum var tapað og nýr óvinur íslensks verkafólks fundinn, útlendingar. Ef þú, kæri lesandi, ert einn af þeim sem hafa flykkst að baki Frjálslynda flokknum eftir að hann tók upp stefnu fjandsamlega útlendingum mæli ég með að þú spyrjir þig eftirfarandi spurninga: Stafar mér ógn af útlendingum? Ógna útlendingar starfsöryggi mínu? Hafa laun mín lækkað? Er það útlendingum að kenna? Er ég rasisti?

Smári Karlsson, innflytjandi í Noregi.